© oamoiZwoa 2020
oamoiZwoa

Iba uns

Da Jan sogd eng iaz amoi wias herganga is…

Mia sand oamoi Zwoa… aiso oamoi da Marco und oamoi da Jan. Kenna doama uns scha seit Schuizeitn und do hama uns scha iba d`Muse kennagleand. Da Marco mocht scha owei hauptsächlich Metal. De wo na kennand wissnd ja eh dasa da Sänger vo „Steel engraved“ is. Ob de oba a ole wissnd dasa a sanft ka? (Er kanns!!!) Oba er hod ja scha meara gmochd. Damois in da Schui is mid „Disregarded“ aganga, dann hoda moi bei de „Monsters of Rock“ gsunga. Weidaganga is dann mit „British Steel“, de se dann zu „Stainless Steel“ weida entwicklt ham und aus dene dann de wohlbekannten „Steel engraved“ woan sand. Mid dera Gruppn hod da Marco iaz scha drei CD´s aussabrochd und war scha fast weltweit unterwegs. So SahneGIGs hams ghod wia afm „70000tons of Metal“ (Schiff) in Miami oder in Dubai, vo de ganzn Länder rund um Deutschland ganz zu schweigen. I hob me friaras a weng am PunkRock probiert, des is oba noch da Schui dann a wieder goa gwen. Dann hobe aussa hi und do moi ganz privat oba mid da Muse zwaif Joa nix mehr da. Bis amoi aus heiterem Himmel da Marco agruafa hod und gmoand hod er brauchad mi fia an Auftritt. I hob dann gsogd dasa spinnd und dase scha zlang weg bin vo da Materie. Nochlossn hoda ned so schnai und dann hama uns moi af a Probeprobe troffa. Des hodma dann doch so daugt und sofort wieder sovai Spaß gmochd, dase ma glei amoi so a Gitarre zu astepsln kaffd han und dann hama probt. So sand dann im Mai 2013 de „New Acoustix“ entstanden. In deara bzw. ähnlicher Konstellation hama dann drei, vier Joar Muse gmochd und a a boa Auftritte ghobd. Irgendwann hams uns dann gfrogd obma a in da Kircha beiana Hochzeit singa dadnd. Und mia natürlich sofort zuagsogd. Dann is natürlich ned bo oana bliem und so andane gloane Sachan hama dann a efta nur na zwoatas gmochd und dann sand langsam oba sicha aus de Anfangs fünf New Acoustix nur na zwoa woan und de ham se dengd so zwoa Gschiggde wia uns zwoa gibds nur oamoi und desweng sama heid oamoi Zwoa.“